CMATI

Vostede está en:
|
|
|
Compartir

A Xunta recibe seis ofertas para executar as obras de humanización da avenida do Bierzo no concello do Barco de Valdeorras, que suporán un investimento autonómico de 815.000€

Os traballos contan cun prazo de 8 meses e o obxectivo é poder inicialos este verán

Actuarase nos primeiros 655 metros da estrada autonómica OU-622 para reforzar a seguridade viaria e facer máis humano e accesible este treito urbano

Mellorarase a accesibilidade nas dúas pontes, sobre a vía do tren e o río Cigüeño, e ampliaranse as beirarrúas para facilitar o tránsito peonil e o acceso aos edificios

Reforzarase a seguridade no contorno do colexio Divina Pastora e nas rutas de chegada dos cativos ao centro, distanciando o tráfico rodado da zona de tránsito

Tamén se renovará o saneamento e abastecemento, a iluminación e a semaforización, asumindo o Concello a titularidade do treito tras as obras

Santiago de Compostela, 7 de abril de 2021.- A Consellería de Infraestruturas e Mobilidade recibiu un total de seis ofertas para executar as obras de renovación da avenida do Bierzo, no núcleo urbano do Barco de Valdeorras.

A actuación ten como finalidade a mellora da accesibilidade e a humanización da contorna. Para acadar este obxectivo, a Xunta investirá preto de 815.000 euros, tendo en conta a reposición dos servizos afectados.

Os traballos contan cun prazo de execución de 8 meses e a previsión é inicialos neste mesmo verán.

Actuarase nos primeiros 655 metros da estrada autonómica OU-622, o treito da vía cun carácter máis urbano, para reforzar a seguridade e facer máis humana e accesible a súa contorna.

Para conseguir este obxectivo, mellorarase a accesibilidade nas pontes situadas no inicio da estrada autonómica: do punto quilométrico 0+000 ao 0+200, para salvar a vía ferroviaria; e do quilómetro 0+275 ao 0+290, para salvar o río Cigüeño.

Ademais, incrementarase o ancho da beirarrúa na marxe esquerda, na medida en que sexa posible, coa fin de mellorar a mobilidade para o tránsito peonil dos veciños, así como a accesibilidade aos edificios localizados na zona, que na actualidade dispoñen de accesos con importantes desniveis. Tamén a partir do punto quilométrico 0+320 e ata o 0+655 se ampliará o ancho das dúas beirarrúas.

Ademais, reordenaranse os usos da avenida do Bierzo no seu treito central, en canto ao tráfico peonil, de vehículos e zonas de estacionamento.

Este proxecto do departamento que dirixe Ethel Vázquez persegue a mellora das condicións de seguridade viaria no contorno do colexio Divina Pastora, así como nas rutas de chegada dos cativos ao colexio, distanciando o tráfico rodado da zona de tránsito.

Destaca na intervención a renovación das infraestruturas de abastecemento e saneamento que discorren por ambas as marxes e que presentan un grado de deterioro importante debido ao paso do tempo.

Neste sentido, e tendo en conta que se levarán a cabo melloras de servizos que son de competencia municipal, como o saneamento, o abastecemento, a iluminación e a semaforización, a Xunta solicitou a implicación do Concello, que se comprometeu a asumir a titularidade do treito, unha vez finalizados os traballos.

Departamentos relacionados

  • Gabinete de comunicación

  • Correo-e: civ.prensa@xunta.es