CMATI

Vostede está en:
|
|
|
Compartir

A Xunta adxudica as obras de acondicionamento da Ponte Frieira, na estrada OU-412, nos concellos de Crecente e Padrenda

Esta actuación, adxudicada por un importe de 47.600 euros, comezará nas vindeiras semanas e terá un prazo de execución de 4 meses

As obras consistirán na reparación desta ponte que cruza o Miño e conecta os dous núcleos da Frieira, un no concello de Crecente e o outro no de Padrenda

Os traballos centraranse no arranxo da estrutura e de elementos como as escaleiras, a varanda ou as beirarrúas

Santiago de Compostela, 25 de xuño de 2020.- A Consellería de Infraestruturas e Mobilidade vén de adxudicar as obras de acondicionamento da Ponte Frieira, na estrada OU-412, nos concellos de Crecente e Padrenda.

Esta actuación, adxudicada á empresa Explotaciones Medioambientales, S.L.U. por un importe de 47.600 euros, comezará nas vindeiras semanas e terá un prazo de execución de 4 meses.

O obxecto da obra é a reparación desta ponte que cruza o Miño e conecta os dous núcleos da Frieira, un pertencente ao concello de Crecente e o outro ao de Padrenda.

Esta infraestrutura tamén permite o acceso peonil á estación de tren da Frieira mediante unha escaleira metálica.

Os traballos centraranse no arranxo das deficiencias da estrutura, así como de elementos como as escaleiras, a varanda, as beirarrúas e as xuntas.

A reparación da estrutura metálica da escaleira e a súa varanda realizarase mediante un chorreado con area a alta presión e unha limpeza con aire para eliminar residuos. Tamén se acometerá un tratamento superficial do aceiro coa aplicación dunha pintura de protección.

Nas beirarrúas reporase a baldosa hidráulica nas zonas deterioradas e disporanse cubrexuntas.

Departamentos relacionados

  • Gabinete de comunicación

  • Correo-e: civ.prensa@xunta.es