CMATI

Vostede está en:
|
|
|
Compartir

A Xunta intensifica a aplicación do Plan de Seguridade Viaria co reforzo da mellora dos firmes das estradas, a execución de sendas e a eliminación de treitos de concentración de accidentes

Francisco Menéndez fai fincapé no avance da estratexia para ter suprimidos en 2020 os ‘puntos negros’ nas vías autonómicas, coa achega de 12,3 millóns de euros

Destaca que os Orzamentos da Xunta para 2019 prevén unha partida específica para reforzos de firme que ascende a 21,7 millóns de euros

Sinala que en 2020 o Goberno galego terá dotado ás comarcas galegas duns 170 km de itinerarios seguros, sustentables e integrados na paisaxe

Subliña o traballo a prol da eliminación de obstáculos nas vías co obxectivo de conseguir “estradas que perdoen” os erros que se poden cometer e dar unha segunda oportunidade de voltar á calzada

A Xunta tamén continúa co impulso de campañas de sensibilización en materia de seguridade viaria, de actividades formativas nos colexios, distribución de prendas reflectantes a peóns e ciclistas ou os cursos de condución segura de motos

Santiago de Compostela, 7 de febreiro de 2019.- O director da Axencia Galega de Infraestruturas, Francisco Menéndez, interveu hoxe na Comisión 2ª do Parlamento de Galicia, na que salientou que a Xunta está a intensificar a aplicación do Plan de Seguridade Viaria de Galicia mediante o reforzo de mellora de firmes, execución de sendas e eliminación de tramos de concentración de accidentes.

Francisco Menéndez destacou a intensificación das melloras de firmes nas estradas autonómicas cun investimento este ano de 21,7 millóns de euros.

Fixo fincapé no desenvolvemento da estratexia para a eliminación de treitos de concentración de accidentes, cun investimento de 12,3 millóns de euros, co obxectivo de telos suprimido todos en 2020. A día de hoxe, xa foron sometidos a información pública 15 proxectos; licitadas catro obras e se executaron outras nove actuacións, e nas vindeiras semanas continuarase avanzando coa licitación de novas obras.

O Executivo autonómico tamén continúa co Plan de Sendas, que busca crear itinerarios que diminúan o perigo para as persoas que opten pola mobilidade alternativa. Este Plan contará en 2019 con 6,4 millóns de euros para rematar actuacións en execución ou xa licitadas e impulsar outras nas comarcas galegas, ata ter construídos en 2020 uns 170 km de sendas.

Puxo en valor que todas as actuacións desta Consellería en materia de estradas se deseñan con criterios de mellora da seguridade viaria. Neste sentido, destacou a conversión en autovía do corredor do Morrazo, cos sete primeiros quilómetros en servizo que se completarán en neste 2019.

 

A Xunta tamén segue traballando na eliminación de obstáculos en estradas, que ten por obxectivo conseguir “estradas que perdoen” os erros que se poden cometer e dar unha segunda oportunidade de voltar á calzada. Así, licitouse a actuación de eliminación de barreiras nas estradas AG-58, AG-59, CG-1.5, AC-537 e AC-554, que está a piques de ser rematada cun investimento de máis de medio millón de euros.

O director recordou que tamén se seguen a desenvolver medidas dirixidas aos usuarios máis vulnerables das estradas: peóns, ciclistas e motoristas. No eido da concienciación en seguridade viaria, continúa a Campaña “O corazón está do teu lado”, enfocado aos escolares; a adquisición de novas prendas reflectantes para peóns e ciclistas; ou os cursos de condución segura de motos.

Departamentos relacionados

  • Gabinete de comunicación

  • Correo-e: civ.prensa@xunta.es