CMATI

Vostede está en:
|
|
|
Compartir

A Xunta destaca a súa colaboración co Concello de Viveiro para paliar os danos das chuvias extraordinarias e avoga por traballar conxuntamente na prevención de asolagamentos

Vázquez Mourelle deu conta dos informes dos especialistas en xestión de leitos fluviais, que indican que o desbordamento do río debeuse á forza e a velocidade de baixada da auga que arrincou árbores que obstruíron o río

Salienta que a Xunta puxo desde o primeiro momento á disposición do Concello os medios de conservación de estradas e 3 equipos de Augas de Galicia que continúan a traballar na retirada dos residuos do río

Aclara que a limpeza da maleza do río no treito urbano do barrio da Xunqueira correspóndelle ao Concello, para o que a Xunta pon a súa disposición as ferramentas que axilizan as tarefas de mantemento e conservación do dominio público hidráulico

Apunta a necesidade de impulsar unha reflexión conxunta para evitar este tipo de sucesos tráxicos, desde o punto de vista da xestión dos ríos, da protección civil e do urbanismo

  • A conselleira de Infraestruturas e Mobilidade, hoxe, no Parlamento

Santiago de Compostela, 5 de decembro de 2018.- A conselleira de Infraestrutura e Mobilidade, Ethel Vázquez, destacou hoxe a colaboración do Goberno galego co Concello de Viveiro para paliar os danos causados polas chuvias extraodinarias vividas o pasado 18 de novembro no núcleo de Xunqueira. Ademais, a conselleira avogou por continuar a traballar conxuntamente para abordar, desde o punto de vista da xestión dos ríos, da protección civil e do urbanismo, a necesaria prevención dos asolagamentos.

En resposta a unha pregunta parlamentaria, a conselleira deu conta das primeiras conclusións que se extraen dos informes técnicos sobre o sucedido en Viveiro, e que sinalan a extraordinaria cantidade de chuvia concentrada nun espazo e tempo moi acotados.
Vázquez Mourelle trasladou así hoxe á Cámara galega toda a información recabada pola Xunta na investigación aberta desde o primeiro momento para coñecer as causas do sucedido, así como o balance dos traballos realizados desde a Xunta.

Segundo sinalou, as primeiras conclusións dos técnicos, cos datos que dispoñen ata agora, apuntan que o desencadeante dos asolagamentos foi a intensidade da chuvia caída en tan pouco tempo, nunha conca pequena e moi pendente, como é a do río Xunqueira. Esa intensísima, engadiu, arrincou e arrastrou árbores cara o leito do río.

Deste xeito, remarcou, a intensidade, a forza e a velocidade de baixada da auga arrincaron árbores ao seu paso, que actuaron como obstáculos, obstruíndo o río e provocaron o seu desbordamento. Un fenómeno que os técnicos, segundo cálculos de probabilidade, estiman que se poden producir 1 vez cada 500 anos, dixo.
Na súa intervención, Ethel Vázquez destacou que a zona afectada polos asolagamentos producidos está catalogada de risco potencial significativo de inundacións. Tendo en conta iso, apostou por traballar da man do Concello, e das demais Administracións, para facer unha reflexión conxunta e global e poñer os medios necesarios para tratar de evitar que o sucedido en Xunqueira se volva a repetir.

Desde o punto de vista da xestión dos ríos, a conselleira explicou que a Xunta está a ofrecer as máximas facilidades para acometer labores de limpeza e conservación dos leitos dos ríos, a través dunha declaración responsable e sen necesidade de autorización. Esta declaración, dixo, é un mecanismo que simplifica, axiliza e favorece a realización de actuacións menores de mantemento e conservación do dominio público hidráulico.

Lembrou que na súa visita a Viveiro, a Xunta e o Concello coincidiron en priorizar o traballo de limpeza e asistencia aos afectados, e que se tiñan que avaliar os danos e, en función diso, incidiu, continuar actuando

Salientou que o Goberno galego púxose á disposición do Concello de Viveiro e dos veciños para axudar en todo aquilo que era urxente e prioritario. A Xunta desprazou ao lugar os medios de conservación de estradas e 3 equipos de Augas de Galicia que continúan a traballar na retirada dos residuos do río.

Departamentos relacionados

  • Gabinete de comunicación

  • Correo-e: civ.prensa@xunta.es